عملية إنقاذ طفل عمره ثلاث سنوات من نزيف شديد في الأمعاء

الطفل ريان عند 3 سنوات قضى سنتين كاملين منهم بيعاني من نقص شديد في الهيموجلوبين وبيضطر ينقل دم كل شهر لسبب مش معروف.

الطفل عمل فحوصات كتير وتحليل حساسية أكل ومنظار هضمي وتم تشخيصه بحساسية الطعام بشكل مبدئي، واتمنع الطفل من معظم أنواع الأكل لمدة شهرين نقل فيهم دم مرتين واستمرت معاناته مع نفس الأعراض.

لحد ما قرر أهله يعرضوه على دكتور الأطفال المتميز أحمد الخطيب إللي قدر يحدد إن دي مش حساسية طعام أول ما شاف الفحوصات إللي عملها الطفل وحدد إنه لازم يعمل منظار هضمي مرة تاني بإيد الدكتور محمد ربيع ، وللدهشة كانت نتائج المنظار سليمة تمامًا ومفيش أي مشكلة.

وبكدا استنتج الدكاترة إن مشكلة الطفل في المنطقة العمياء من الأمعاء الدقيقة وإللي المنظار مبيقدرش يوصلها وقرروا ضرورة إن الطفل يعمل أشعة بالصبغة على الأوعية الدموية في الأمعاء الدقيقة، ولكن للصدمة كانت الأشعة كمان سليمة ومبينتش أي حاجة .

وبسرعة قرر الدكاترة يعرضوا الحالة على دكتور حامد سليم استشارى جراحة الجهاز الهضمى للأطفال لإجراء عملية استكشافية عن طريق السرة، وإللي أظهرت وجود وحمة دموية كبيرة جدًا في المنطقة العمياء من الأمعاء (الصائم).

وبكدا اكتمل التشخيص، الطفل بينزف بسبب الوحمة دي وبينزل الدم مع البراز عشان كدا كان بيتحول لونه للون الإسود، وده بيفسر نقص الهيموجلوبين الشديد عند الطفل واحتياجه كل فترة لنقل الدم، وبعد إزالة الوحمة دي بدأ الطفل يتحسن بشكل واضح ومحتجش بعد كدا نهائي إنه ينقل دم.

وبفضل الله تم إنقاذ حياة الطفل وإنهاء معاناته على إيد نخبة من أفضل الأطباء في مصر.